छंद के परिचय

//छंद//
 कविता के हर रंग मा, नियम-धियम हे एक ।
गति यति लय अउ वर्ण ला, ध्यान लगा के देख ।

आखर गति यति के नियम, आखिर एके बंद ।
जे कविता मा होय हे, ओही होथे छंद ।।

अनुसासन के पाठ ले, बनथे कोनो छंद ।
देख ताक के शब्द रख, बन जाही मकरंद

//छंद के अंग//
गति यति मात्रा वर्ण तुक, अउ गाये के ढंग ।
गण पद अउ होथे चरण, सबो छंद के अंग ।।

छंद पाठ के रीत मा, होथे ग चढ़ उतार ।
छंद पाठ के ढंग हा, गति के करे सचार ।।

पढ़त-पढ़त जब छंद ला, रूकथन गा हम थोर ।
बीच-बीच मा आय यति, गति ला देथे टोर ।।

//आखर के भेद//
आखर के दू भेद हे, स्वर व्यंजन हे नाम ।
‘अ‘ ले ‘अः‘ तक तो स्वर हे, बाकी व्यंजन जान ।
बाकी व्यंजन जान, दीर्घ लघु जेमा होथे ।
‘अ‘ ‘इ‘ ‘उ‘ ह लघु स्वर आय, बचे स्वर दीर्घ कहाथे ।
लघु स्वर जिहां समाय, होय लघु ओमा साचर ।
जभे दीर्घ स्वर आय, दीर्घ हो जाथे आखर ।।

आखर के गिन मातरा, लघु के होथे एक ।
दीर्घ रखे दू मातरा, ध्यान लगा के देख ।
ध्यान लगा के देख, शब्द बोले के बेरा ।
परख समय ला बोल, लगय कमती के टेरा ।।
कमती होथे एक, टेर ले होथे चातर ।
‘‘कोदू‘ ‘कका‘ ल देख, गिने हे अपने आखर ।।

//तुक//
जेन शब्द के अंत के, स्वर व्यंजन हे एक ।
एक लगय गा सुनब मा, तुक हो जाथे नेक ।।

गति अउ यति के मेल ले, होथे लय साकार ।
गुरतुर बोली लय बनय, मोहाजय संसार ।।

//गण//
तीन-तीन आखर मिले, आये एक समूह ।
लघु गुरू के क्रम ला कहव, कविता के गण रूह ।।

//छंद के प्रकार//
मात्रा आखर छंद के, होथे जइसे प्रान ।
येखर सेती छंद के, दुई भेद लौ जान ।।

एक भेद हे मातरा, मात्रिक जेखर नाम ।
दूसर हावे आखरा, वार्णिक जेखर नाम ।।

क्रम अउ संख्या वर्ण के, चरण म होय समान ।
तब ओ वार्णिक छंद हे, नही त मात्रिक जान ।।

जेन छंद के हर चरण, मात्रा होय समान ।

संगी ओही छंद ला, सममात्रिक तैं मान ।।

सममात्रिक के भेद हे, येखर सुन गुणगान ।

साधारण बत्तीस तक, आघू दंडक जान ।।